الصكوك الضريبية… فكرة عبقرية، بس يا رب ما نكونش بنصرف ضرايب بكرة النهارده

الصكوك الضريبية في مصر… تمويل ذكي ولا آلة زمن مالية؟

بصراحة، فكرة الصكوك الضريبية فكرة تستحق الوقوف عندها. مش لأنها وحشة. بالعكس… لأنها ذكية جدًا. والأفكار الذكية جدًا هي أكتر أفكار لازم نبص تحت الكبوت بتاعها قبل ما نركب العربية ونطلع على الدائري.

الفكرة ببساطة إن الممول بدل ما يستنى لما الضريبة تستحق عليه السنة الجاية أو اللي بعدها، يدفع جزء منها للدولة النهارده في صورة صك ضريبي، وياخد مقابل ده عائد، وبعد كده تتخصم قيمة الصك من التزاماته الضريبية المستقبلية. يعني بالبلدي، الدولة بتقول لك: إنت هتدفع لي 100 مليون جنيه كمان كام سنة؟ طب هاتهم لي النهارده، وأنا أديك عائد مقابل إنك دفعت بدري.

من ناحية التدفقات النقدية الكلام ده جميل جدًا. الدولة محتاجة تمويل، وبدل ما تنزل تقترض كل المبلغ من سوق الدين بأسعار فائدة مرتفعة، بتفتح مصدر تمويل جديد من الممولين نفسهم. والفكرة مش جاية من كوكب المريخ: في أمريكا عندهم من زمان أدوات اسمها Tax Anticipation Notes، حكومات محلية بتقترض مقابل إيرادات ضريبية متوقعة في المستقبل، وفي دول تانية زي أوروجواي والأرجنتين استخدموا أشكال مختلفة من شهادات الخصم الضريبي.

لكن هنا لازم نحط خطين تحت كلمة "أشكال مختلفة". لأن النموذج المصري المقترح، حسب المعلومات المعلنة حتى الآن، بيجمع أكتر من فكرة مع بعض: ضريبة مستقبلية، وتمويل، وعائد استثماري، كله في منتج واحد. وده اللي مخليه مبتكر. وده برضه اللي مخليني قلقان.

تعالى نحط أرقام عشان الموضوع ما يبقاش خناقة خبراء على التلفزيون. افترض إن شركة متوقعة تدفع للدولة خلال السنوات الجاية 100 مليون جنيه ضرائب، والدولة محتاجة الفلوس النهارده. فتقول للشركة: ادفعي الـ100 مليون دلوقتي في صك ضريبي وخدي عائد مناسب، ولما تيجي ضرايبك بعد كده هنخصم لك قيمة الصك. الدولة كده دخل لها 100 مليون كاش النهارده. لكن خلي بالك: لما تيجي السنة اللي كان المفروض الدولة تحصّل فيها الـ100 مليون دول كضريبة، الفلوس مش هتدخل تاني… لأنها دخلت قبل كده.

يعني إحنا ما خلقناش فلوس جديدة. إحنا سحبنا إيراد بكرة وصرفناه النهارده.

وده في البزنس شيء طبيعي جدًا. بس في البزنس فيه سؤال بييجي بعده مباشرة: عملت إيه بالفلوس؟ ودي بالنسبة لي أهم نقطة في الموضوع كله.

وعشان نحس بحجم السؤال، طلّع الحسبة دي من مستوى الشركة الواحدة لمستوى الدولة كلها. لو الحكومة أصدرت 100 مليار جنيه صكوك ضريبية، وبدل ما تقترضهم من السوق بتكلفة 25% جابتهم من الصك بتكلفة 15%، يبقى فيه فرق 10% في التكلفة. يعني نظريًا توفير ممكن يوصل لـ10 مليارات جنيه في السنة قبل احتساب باقي التفاصيل والتكاليف. هنا أقول: برافو. دي هندسة مالية محترمة.

لكن لو الدولة أخدت الـ100 مليار وصرفتهم في مصاريف جارية، وبعد سنتين وصلت للسنة اللي كان المفروض تحصّل فيها الضرايب دي، واكتشفت إن جزءًا من إيراداتها اتحصّل أصلًا… هتعمل إيه؟ تصدر صكوك جديدة على ضرايب 2030؟ وبعدين لما نوصل 2030 نجيب ضرايب 2032؟

هنا العربية اللي كنا بنبص تحت كبوتها بدأت تجري بينا.

وده اسمه ببساطة Fiscal Time Machine: كل شوية بنسافر للمستقبل ونجيب منه شوية فلوس عشان نحل مشكلة الحاضر، لحد ما المستقبل نفسه يوصل… ويكتشف إننا سبناه من غير مصروف. وده أول وأكبر تخوف عندي.

التخوف التاني هو سعر العائد. لو الدولة بتقترض من السوق بتكلفة معينة، والصك الضريبي هيدي الممول عائد قريب جدًا منها، يبقى وفرنا إيه بالظبط؟ غيرنا اسم الورقة؟ الابتكار المالي مش في اسم المنتج. الابتكار الحقيقي في تكلفة التمويل نفسها. لو الصك أرخص بوضوح من الاقتراض التقليدي، ممتاز. لو الفرق هامشي، يبقى لازم نسأل: هل التنازل عن إيراد ضريبي مستقبلي يستاهل أصلًا؟

التخوف التالت أخطر شوية. مين أكتر ناس عندهم التزامات ضريبية مستقبلية كبيرة ومضمونة؟ الشركات الكبيرة. يعني لو التصميم مش معمول بعناية، ممكن نكتشف إننا خلقنا منتج مالي ممتاز جدًا لكبار الممولين، بينما الشركات الصغيرة والمتوسطة واقفة تتفرج من الشباك.

وفيه سؤال رابع مهم. لو شركة اشترت صكوكًا بـ500 مليون جنيه على أساس توقعاتها الضريبية لخمس سنين، وبعد سنتين حصل ركود أو الشركة خسرت وبقى التزامها الضريبي الحقيقي 150 مليون بس… نعمل إيه في الـ350 مليون الباقيين؟ يتردّوا؟ يتباعوا؟ يتحوّلوا لشركة تانية؟ يمتد أجلهم؟ دي مش تفاصيل صغيرة. دي هي المنتج نفسه.

ومع كل ده، أنا شايف إن الفكرة ممكن تبقى قوية جدًا لو اتعملت بطريقة مختلفة شوية. بدل ما نقول: هات لي ضرايب بكرة عشان أصرفها النهارده، نقول: هات لي جزءًا من ضرايب بكرة النهارده، وأنا هستخدمه عشان أكبّر اقتصاد بكرة. يعني نصدر الـ100 مليار صكوك ضريبية، لكن مربوطة بمشروعات إنتاجية محددة: بنية تحتية صناعية، طاقة، موانئ، لوجستيات، تصنيع للتصدير. مشروعات نقدر نقيس منها حطينا كام وطلعت كام، خلقت كام وظيفة، زوّدت الصادرات بكام، وخلقت للدولة قاعدة ضريبية جديدة قد إيه.

ساعتها المعادلة تتغير تمامًا. لأنك مبقتش بتستلف من بكرة. إنت بقيت بتستثمر ضرايب بكرة عشان تخلق ممولين بكرة. وده بالنسبة لي الفرق بين الهندسة المالية… واللعب في عداد الزمن.

الصكوك الضريبية ممكن تكون واحدة من أذكى أدوات التمويل اللي اتعملت في مصر. وممكن برضه تتحول لطريقة شيك جدًا إننا نصرف إيرادات المستقبل قبل ما المستقبل يوصل. والفرق بين الاتنين مش اسم الصك، ولا الإعلان عنه، ولا حتى العائد. الفرق كله في سؤال واحد بسيط جدًا:

الفلوس اللي أخدناها من بكرة… هنعمل بيها إيه النهارده؟

لأن بكرة، للأسف، عنده عادة سخيفة جدًا…

إنه بييجي.