بتثق فيه؟ ممتاز… هذا مش سبب كافي تعطيه نص الشركة

تخيّل إنك بدأت شركة مع شريك، ومن أول يوم أعطيته 45% من الشركة. بدأتوا متحمسين، الخطة عظيمة، وكل واحد فيكم مقتنع إنه وجد الشريك المثالي. بعد ستة أشهر فقط، صاحبنا قرر: “الموضوع مش إلي… السلام عليكم” ويترك المشروع ويروح يكمل حياته.

وأنت؟ تكمل تشتغل. تبني المنتج، تجيب العملاء، توظف فريق، تحل المشاكل، ويمكن بعد سنوات ترفع قيمة الشركة أضعاف. وهو؟ ممكن يظل مالك للـ45% اللي اتفقتوا عليها يوم كان الاتفاق عالبركة… أو زي ما بحكوا إخواتنا المصريين: «اليوم الإسود»، رغم إنه لم يعد فعليا موجود في الشركة.

يعني باختصار: أنت تكمل تبني الشركة… وهو يكمل يمتلك تقريبًا نصها من بعيد.

مستفز؟ المفروض. لأن اختيار الشريك وتوزيع الحصص مش قرار نأخذه على طاولة قهوة بجملة: “إحنا حبايب وبنفهم على بعض.”

أحيانًا المشكلة مش بالسوق… المشكلة بالشخص اللي قاعد جنبك

لو سألت مؤسس عن أكبر مخاوفه، سييخوض في مشاكل المنافسين، التمويل، السوق أو المبيعات. أما الشريك؟ غالبًا نتعامل معه وكأنه الجزء المضمون من القصة؛ وهون المشكلة...

في تحليل لأكثر من 3,000 حالة لشركات ناشئة، ظهرت مشاكل الفريق والشركاء المؤسسين بنسبة 23% ضمن أبرز أسباب الفشل في التصنيف. والأكثر لفتًا للانتباه أن الخلافات داخل الفريق والصراعات الداخلية ظهرت مرة ثانية بشكل منفصل بنسبة 10%.

والأرقام هنا لا تُجمع مع بعضها، لأن الرسم مبني على عينات ودراسات مختلفة، لكن الرسالة أهم من جمع النسب: مشاكل المؤسسين والفريق ليس تفصيلًا جانبيًا ممكن نأجله لمرحلة “لما نكبر بنشوف”.

واللافت أكثر أن مشاكل الفريق والشركاء ظهرت في هذا التصنيف بنسبة أعلى من الخسارة أمام المنافسين، التي بلغت 20%. وهذا لا يعني أن شريكك دائمًا أخطر من المنافس، لكنه يطرح مفارقة تستحق التفكير.

نقضي أسابيع نحلل المنافسين، ندرس السوق، نحسب التكاليف ونراجع خطة العمل (Business Plan) … وبعدين نختار الشخص اللي رح يملك معنا الشركة بجملة: “بعرفه من زمان… شخص مضمون.” يمكن لازم نعمل شوية عناية واجبة (Due Diligence) على الشريك كمان.

قبل ما تختار شريكك… اعرف أنت شو ناقصك

قبل ما تسأل: “مين أفضل شخص أشاركه؟” اسأل سؤال أهم: هل أنا أصلًا بحاجة لشريك؟ وإذا نعم… ليش؟

وهون لازم تكون صريح مع حالك وتعرف نقاط ضعفك في المشروع. هل أنت ممتاز بالمنتج لكن ضعيف بالمبيعات؟ عندك الجانب التجاري لكن ما عندك الخبرة التقنية؟ تحتاج شخصًا يدير العمليات؟ تحتاج رأس مال؟ أم ببساطة خايف تبدأ وحدك؟

مش كل نقطة ضعف عندك تحتاج مقابلها شخصًا يأخذ حصة (Equity) من الشركة. إذا بدك حدا يعمل التسويق، يمكن تحتاج مدير تسويق (Marketing Manager)… مش شريك ياخذ 30% من الشركة. إذا بدك خبرة، يمكن تحتاج مستشار. وإذا بدك تمويل، يمكن تحتاج مستثمر.

الشريك مش موظف أرخص، ومش مستشار دائم، ومش شخص نوزع عليه حصص لأننا متحمسين نبدأ سوا. الشريك أصبح جزءًا من الملكية، والقرار، والمخاطرة، ومستقبل الشركة.

وهذا قرار أكبر بكثير من: “إحنا بنفهم على بعض.”

قبل ما تقول 50/50… اتفقوا شو كل واحد جايب معه

من أسهل الحلول في البداية: “نقسمها بالنص ونرتاح.” وممكن فعلًا يكون 50/50 أعدل تقسيم. وممكن يكون أسرع طريقة لتأجيل نقاش ما بدكم تفتحوه. لأن الحصة لا تعتمد فقط على مين جاء بالفكرة. واحد قد يأتي برأس المال، والثاني يعمل بدوام كامل (Full-time)، والثالث عنده التقنية أو الخبرة أو شبكة العلاقات أو القدرة على البيع.

المهم مش مين “أهم”. المهم يكون واضح: شو كل شخص بقدم للشركة؟ شو دوره؟ قديش التزامه؟ وشو المتوقع منه بعد سنة وسنتين وثلاثة؟

وهنا نعود لسيناريو البداية: شو بصير إذا أعطيت شريكك حصة كبيرة، وبعد عدة أشهر قرر يطلع؟ هل من المنطقي أن يظل محتفظ بكامل الحصة بينما شخص آخر يكمل بناء الشركة؟

هون لازم أي مؤسس داخل شراكة يعرف مصطلحين مهمين: الاستحقاق التدريجي (Vesting) وفترة الانتظار الأولى (Cliff).

الحصة مش هدية ترحيبية

الـVesting ببساطة يعني أن حصة المؤسس تُستحق تدريجيًا مع الوقت، بدل ما تصبح كلها مستحقة له بشكل نهائي من أول يوم.

خلينا نبسطها بالأرقام. افترض أنكم اتفقتوا أن حصة شريكك 40%، مع Vesting على أربع سنوات. هذا يعني بشكل مبسط، إذا تم توزيع الاستحقاق بالتساوي، فهذا يعادل تقريبًا 10% من الشركة عن كل سنة، بدل ما تصبح الـ40% كلها له نهائيًا في اليوم الأول.

الفكرة مش تعقيد الحصص. الفكرة ربط الملكية بالاستمرار والمساهمة الفعلية. لأن أول شهر الكل متحمس، وكل الاجتماعات فيها طاقة، وخطة الخمس سنوات شكلها رائع على الـPowerPoint.

السؤال مش مين متحمس اليوم… السؤال مين رح يضل موجود لما الحماس يخلص ويبدأ الشغل الحقيقي؟.

وجود Vesting يقلل احتمال أن يخرج أحد المؤسسين مبكرًا ويظل محتفظًا بحصة ضخمة من شركة لم يعد يساهم في بنائها. ومن النماذج الشائعة للمؤسسين أن يكون الاستحقاق على أربع سنوات، مع Cliff لمدة سنة واحدة.

“الموضوع مش إلي… السلام عليكم”

الـCliff هو فترة أولية لا يثبت خلالها استحقاق أي جزء من الحصة قبل إكمالها، وعند تجاوزها يبدأ أول جزء من الاستحقاق حسب الجدول المتفق عليه.

نرجع لنفس المثال: شريك له 40%، مع Vesting لأربع سنوات و Cliff لمدة سنة واحدة.

إذا قرر يطلع بعد 10 أشهر، ففي النموذج الشائع لم يكمل الـCliff، وبالتالي لا يكون قد استحق أي جزء من حصته بعد. أما إذا أكمل السنة الأولى، فيكون قد استحق ربع الحصة الموعودة؛ يعني في مثالنا 10% من الشركة، ثم تستمر بقية الحصة بالاستحقاق تدريجيًا حسب الجدول المتفق عليه.

فلو قرر بعد خمسة أشهر يقول: “الموضوع مش إلي… السلام عليكم.” جميل إنك اكتشفت حالك! بس الشركة مش لازم تدفع ثمن رحلة اكتشاف الذات هاي للأبد.

وطبعًا هذه أمثلة للتوضيح، وليست وصفة قانونية ثابتة. النسب والفترات وآلية الاستحقاق تختلف حسب الاتفاق، وهيكل الشركة، والقانون الذي تخضع له.

اتفاق المؤسسين: الأشياء اللي مش حابين تحكوا فيها… هي اللي لازم تحكوا فيها

وهنا نصل إلى اتفاق المؤسسين (Founders Agreement) الذي يعتبر أهم وأول خطوة قبل أي شيء. الهدف منه مش إنكم تدخلوا الشراكة وأنتم متوقعين الخيانة والمؤامرات، الهدف ببساطة إنكم ما تعتمدوا على الذاكرة وحسن النية لما تبدأ الأمور تصير معقدة.

مين الـCEO؟ مين مسؤول عن شو؟ مين عنده صلاحية اتخاذ أي قرار؟ هل الاثنين Full-time؟ هل واحد منكم يأخذ راتبًا والثاني لا؟ إذا احتاجت الشركة تمويلًا إضافيًا، شو بصير؟ إذا اختلفتم على قرار مصيري، كيف يُحسم؟ وإذا واحد قرر يطلع، شو بصير بحصته؟ وإذا أراد يبيعها، هل يستطيع بيعها لأي شخص؟

وفي سؤال يمكن يكون أهم من كل هاي التفاصيل: هل إحنا أصلًا بدنا نفس الشيء من الشركة؟

يمكن شريك يعتبر النجاح إنه يبيع الشركة بعد خمس سنوات مقابل 2 مليون دولار ويروح يعيش حياته مبسوط، والثاني حلمه يبني شركة قيمتها مليار دولار وما عنده أي نية للبيع. ولا واحد منهم غلط. بس جدًا غلط يكتشفوا هذا الاختلاف بعد خمس سنوات.

وعشان ما توصلوا لهالمرحلة، لازم تحكوا من البداية عن توقعاتكم: النمو، التمويل، البيع، التوسع، مستوى المخاطرة، والوقت اللي كل شخص مستعد يعطيه للمشروع. وبعدها وثقوا اتفاقكم بصيغة قانونية مع محامٍ مختص حسب بلد تسجيل الشركة وهيكلها.

لأن مناقشة هاي الأسئلة وأنتم بتحبوا بعض… أرخص بكثير من مناقشتها مع محاميين وأنتم ما بتحكوا مع بعض.

شوي نصائح عالماشي

لا تختار شريكك فقط لأنه يشبهك. أحيانًا أفضل شريك هو الشخص اللي يكملك في شيء أنت ضعيف فيه، مش نسخة ثانية منك توافقك على كل شيء.

ولا تختاره فقط لأنه عنده فلوس. رأس المال مهم، لكنك تختار شخصًا سيشاركك الملكية والقرارات لسنوات… مش ATM معه رأي.

واحكوا عن الوقت بوضوح. هل الاثنين Full-time؟ هل واحد عنده وظيفة ثانية؟ كم التزام كل شخص فعلًا؟ لأن “رح أعطي المشروع كل وقتي” جملة جميلة جدًا… لحد ما ينزل أول راتب من الوظيفة الثانية.

وافصلوا بين الحصة والراتب. امتلاك 50% من الشركة لا يعني تلقائيًا أن رواتبكم لازم تكون متساوية. الملكية شيء، والدور التنفيذي والتعويض عنه شيء ثاني.

واتفقوا أيضًا على طريقة اتخاذ القرار، لأن 50/50 تبدو جميلة جدًا… إلى أن تختلفوا على قرار ما في فيه نص قرار.

والأهم: اتفقوا كيف ممكن تنفصلوا قبل ما تحتاجوا تنفصلوا.

الثقة مهمة… بس الاتفاق مش ضد الثقة

الشراكة الجيدة مش شراكة ما فيها خلافات؛ هاي غالبًا غير موجودة أصلًا. الشراكة الجيدة هي اللي تعرف من البداية شو تعمل لما الخلاف يحصل. لذلك اتفاق المؤسسين (Founders Agreement) مش دليل إنكم ما بتثقوا ببعض، والاستحقاق التدريجي (Vesting) مش تشكيك بنوايا صاحبك، والحديث عن الخروج مش تشاؤم. بالعكس…

يمكن يكون أكبر دليل إنكم داخلين الشراكة بعقل… مش بس بحماس.

فإذا كنت على وشك تعطي شخصًا 45% أو 50% من شركتك لأنه صاحبك من 15 سنة و“مستحيل تختلفوا”… ممتاز. بس عندي إلك سؤال واحد:

إذا بعد ستة أشهر قال لك: “الموضوع مش إلي… السلام عليكم”، أنت عارف بالضبط شو بصير بحصته؟